स्वीकृत नगरसेवकपदी जयंतकाका पाटील, नरेंद्र लिबे व सुहास जगताप
कराड/प्रतिनिधी : –
कराड नगरपालिकेच्या उपनगराध्यक्ष पदाची, तसेच स्वीकृत नगरसेवक पदांची निवडणूक प्रक्रिया बुधवारी शांततेत पार पडली. यामध्ये उपनगराध्यक्ष पदासाठी पोपटराव साळुंखे यांची बिनविरोध निवड जाहीर झाली, तर स्वीकृत नगरसेवकपदी लोकशाही आघाडीचे जयंतकाका पाटील, यशवंत विकास आघाडीचे नरेंद्र लिबे आणि भाजपचे सुहास जगताप यांची निवड करण्यात आली. या निवडी नगराध्यक्ष तथा निवड पिठासन अधिकारी राजेंद्रसिंह यादव यांनी अधिकृतरित्या जाहीर केल्या.
मुख्याधिकाऱ्यांकडे अर्ज : उपनगराध्यक्ष पदासाठी सकाळी १० ते दुपारी १२ या वेळेत नामनिर्देशन अर्ज स्वीकारण्यात येत होते. या कालावधीत सकाळी ११.३० वाजता पोपटराव साळुंखे यांनी मुख्याधिकारी प्रशांत व्हटकर यांच्याकडे आपला अर्ज दाखल केला.
बिनविरोध निवड निश्चित : निर्धारित वेळेत अन्य कोणताही अर्ज दाखल न झाल्याने पोपटराव साळुंखे यांची उपनगराध्यक्षपदी बिनविरोध निवड निश्चित झाली. निवड जाहीर होताच लोकशाही आघाडीच्या कार्यकर्त्यांनी फटाक्यांची आतषबाजी करत आनंद साजरा केला. संपूर्ण नगरपालिका परिसरात गुलाल उधळत जल्लोषाचे वातावरण निर्माण झाले.
विशेष सभा : यानंतर दुपारी १२ वाजता नगराध्यक्ष राजेंद्रसिंह यादव यांच्या अध्यक्षतेखाली झालेल्या विशेष सभेत निवडीची औपचारिक घोषणा करण्यात आली.
स्वीकृतसाठी जिल्हाधिकाऱ्यांकडे अर्ज : स्वीकृत नगरसेवक पदासाठी यापूर्वी दि. १५ रोजी सातारा जिल्हाधिकारी संतोष पाटील यांच्याकडे विविध गटांकडून नामनिर्देशन अर्ज दाखल करण्यात आले होते. लोकशाही आघाडीकडून माजी उपनगराध्यक्ष व मार्गदर्शक सुभाषराव पाटील, विद्यमान अध्यक्ष जयंतकाका पाटील आणि जयंत बेडेकर यांच्या शिफारशीने नामनिर्देशन दाखल झाले होते. भाजपकडून राजेंद्र डुबल आणि माजी नगरसेवक सुहास जगताप, तर यशवंत विकास आघाडीकडून हणमंतराव पवार आणि नरेंद्र लिबे यांनी अर्ज सादर केले होते.
प्रत्येकी एक जागा : नगरपालिकेतील विद्यमान संख्याबळाचा विचार करता तीन स्वीकृत नगरसेवक निवडले जाणार असल्याने लोकशाही आघाडी, यशवंत विकास आघाडी आणि भाजप या तिन्ही पक्षांना प्रत्येकी एक जागा निश्चित झाली. त्यानुसार लोकशाही आघाडीकडून जयंतकाका पाटील, यशवंत विकास आघाडीकडून नरेंद्र लिबे आणि भाजपकडून सुहास जगताप यांच्या निवडी जाहीर करण्यात आल्या. निवड जाहीर झाल्यानंतर समर्थकांकडून अभिनंदनाचा वर्षाव करण्यात आला.
अभिनंदन सत्कार व शुभेच्छा : या निवडीनंतर नगराध्यक्ष राजेंद्रसिंह यादव यांनी उपनगराध्यक्ष पोपटराव साळुंखे यांचे अभिनंदन करून सत्कार केला. तसेच स्वीकृत नगरसेवक जयंतकाका पाटील, नरेंद्र लिबे आणि सुहास जगताप यांचेही अभिनंदन करून त्यांनी शुभेच्छा दिल्या. यावेळी मुख्याधिकारी प्रशांत व्हटकर यांच्यासह सर्व नगरसेवक, नगरसेविका, नगरपालिकेचे अधिकारी व कर्मचारी उपस्थित होते.
समन्वयाने काम होईल : कराड नगरपालिकेच्या राजकारणात या निवडींमुळे सत्ताधारी व विरोधी गटांचे समीकरण अधिक स्पष्ट झाले असून, आगामी काळात नगरपालिकेच्या कारभारात समन्वयाने काम होईल, अशी अपेक्षा व्यक्त केली जात आहे.
