कराड/प्रतिनिधी : –
कराड दक्षिण विधानसभा मतदारसंघातील पर्यटन विकासाला चालना देण्यासाठी महाराष्ट्र शासनाच्या प्रादेशिक पर्यटन विकास योजनेअंतर्गत २ कोटी रुपयांच्या निधीला प्रशासकीय मान्यता मिळाली आहे. भाजपाचे जिल्हाध्यक्ष आ.डॉ. अतुल भोसले यांच्या सातत्यपूर्ण प्रयत्नांमुळे हा निधी मंजूर झाला असून, यामुळे कराड दक्षिण मतदारसंघातील धार्मिक, सांस्कृतिक आणि पर्यटनस्थळांच्या विकासाला नवसंजीवनी मिळणार आहे.
पर्यटनदृष्ट्या शाश्वत विकास : कराड दक्षिण मतदारसंघात अनेक धार्मिक, ऐतिहासिक आणि नैसर्गिक सौंदर्याने नटलेली पर्यटनस्थळे आहेत. तसेच अनेक देवस्थाने, मठ, मंदिरे आणि सांस्कृतिक परंपरा आहेत. या ठिकाणांचा पर्यटनदृष्ट्या शाश्वत विकास करण्यासाठी कराड दक्षिणचे आमदार भोसले विशेष प्रयत्नशील आहे. कराड दक्षिणमधील रेठरे बुद्रुक व आटके येथील पर्यटन स्थळांच्या विकासासाठी त्यांनी राज्याचे पर्यटन मंत्री ना. शंभुराज देसाई यांच्याकडे वेळोवेळी पाठपुरावा केला होता. याची दखल घेत राज्य शासनाच्या प्रादेशिक पर्यटन विकास योजनेअंतर्गत २ कोटी रुपयांचा निधी मंजूर झाला आहे.
या कामांचा समावेश : या निधीअंतर्गत कराड दक्षिणमधील रेठरे बुद्रुक व आटके येथील दोन प्रमुख पर्यटनस्थळांवर विकासकामे हाती घेण्यात येणार आहेत. रेठरे बुद्रुक येथील श्री महादेव मंदिर आणि श्री जोतिबा मंदिर परिसराचा पर्यटनदृष्ट्या विकास करण्यासाठी दीड कोटींच्या निधीची तरतूद करण्यात आली आहे. या माध्यमातून मंदिर परिसराचे सौंदर्यीकरण, रस्ते व प्रवेशमार्ग दुरुस्ती, प्रकाश योजना, पार्किंग, बसण्याची व्यवस्था, स्वच्छतागृहे आणि पर्यटकांसाठी इतर सुविधा उभारल्या जाणार आहेत. तसेच आटके येथील श्री मुकुंद महाराज मठ परिसरात सभामंडप व सुविधा केंद्र बांधकामासाठी ५० लाख रुपये मंजूर करण्यात आले आहेत. धार्मिक वातावरणास पूरक अशा पद्धतीने हा परिसर विकसित केला जाणार असून, स्थानिक श्रद्धा आणि परंपरा जपण्यावर भर दिला जाणार आहे.
समृद्ध धार्मिक आणि सांस्कृतिक वारसा : या निधीबद्दल बोलताना आमदार भोसले म्हणाले, कराड दक्षिण मतदारसंघात धार्मिक आणि सांस्कृतिक वारसा समृद्ध आहे. या ठिकाणांचा विकास करून स्थानिक अर्थव्यवस्थेला चालना देणे आणि पर्यटन वाढवणे हे आमचे ध्येय आहे. पर्यटन सुविधा वाढल्यास स्थानिक लोकांसाठी रोजगारनिर्मिती, छोट्या व्यावसायिकांना प्रोत्साहन आणि गावांचा सर्वांगीण विकास साधता येईल. येत्या काळात इतर गावांमधील पर्यटनस्थळांसाठीही भरघोस निधी आणण्याचे माझे उद्दिष्ट आहे.
