बैठकीस प्रतिसाद; समस्या प्राधान्याने सोडवण्याचे गटविकास अधिकाऱ्यांचे आश्वासन
कराड/प्रतिनिधी : –
माजी सैनिक, शहीद जवानांचे कुटुंबीय व त्यांच्या नातेवाईकांच्या समस्या जाणून घेण्यासाठी कराड पंचायत समितीमध्ये विशेष बैठकीचे आयोजन करण्यात आले होते. गटविकास अधिकारी प्रताप पाटील यांच्या अध्यक्षतेखाली ही बैठक संपन्न झाली.
बैठक : या बैठकीत तालुक्यातील ग्रामपंचायत व इतर स्तरावरील माजी सैनिकांच्या अडचणींवर सविस्तर चर्चा करण्यात आली.
समस्या प्राधान्याने सोडविणार : यावेळी बोलताना गटविकास अधिकारी प्रताप पाटील यांनी माजी सैनिक आणि त्यांच्या कुटुंबीयांच्या समस्या प्राधान्याने व तातडीने सोडवण्यात येतील, असे आश्वासित केले. याप्रसंगी सर्व माजी सैनिकांचा पुष्पगुच्छ देऊन त्यांनी सन्मानही केला.
मान्यवरांची उपस्थिती : या बैठकीला सैनिक फेडरेशन महाराष्ट्र राज्याचे उपाध्यक्ष प्रशांत कदम, कराड तालुकाध्यक्ष सदाशिव नागणे, उपाध्यक्ष सर्जेराव देसाई, त्रिशक्ती फाउंडेशनचे सचिव विलास जाधव, कराड तालुका पेन्शनर संघटनेचे अध्यक्ष नागेश पाटील, तसेच विविध गावांतील माजी सैनिक संघटनांचे पदाधिकारी मोठ्या संख्येने उपस्थित होते.
माजी सैनिकांनी मांडल्या समस्या : यावेळी चिखली, निगडी, पाडळी केसे, वऱ्हाडे, कोपर्डे, मलकापूर, पाली, पाचुंद, शामगाव या भागांतील माजी सैनिक संघटनांचे प्रतिनिधी आणि कार्यकर्त्यांनी आपल्या भागातील समस्या मांडल्या. यावर प्रशासनाकडून सकारात्मक प्रतिसाद देण्यात आला. बैठकीच्या समारोप प्रसंगी माजी सैनिकांनी ‘भारत माता की जय’ आणि ‘वंदे मातरम्’च्या घोषणा दिल्या.
