कराड विमानतळ विस्तारीकरण; आ.डॉ. अतुल भोसले यांच्या प्रयत्नांना यश
कराड/प्रतिनिधी : –
कराड विमानतळाच्या विस्तारीकरणांतर्गत येथील भैरवनाथ सहकारी पाणीपुरवठा योजनेच्या पाईपलाईन स्थलांतरासाठीच्या सुधारित वाढीव खर्चास भाजपा-महायुती सरकारने मान्यता दिली असून, १७.१६ कोटी रुपयांच्या निधी मंजूर करण्यात आला आहे.
अनेक महिन्यांपासून पाठपुरावा : या कामासाठी भाजपाचे जिल्हाध्यक्ष आ.डॉ. अतुल भोसले गेल्या अनेक महिन्यांपासून प्रयत्नशील होते. त्यांच्या प्रयत्नांना यश लाभले असून, लवकरच या पाईपलाईनचे स्थलांतर होऊन, विमानतळ विस्तारीकरण कामाला गती मिळण्यास मदत होणार आहे.
चव्हाण साहेबांच्या पुढाकारातून विमानतळ : कराड हे पश्चिम महाराष्ट्रातील मध्यवर्ती ठिकाण असून, याठिकाणी दिवंगत यशवंतराव चव्हाण यांच्या पुढाकारातून विमानतळ उभा राहिले.
विस्तारीकरणासाठी २२१.५१ कोटींचा निधी : या विमानतळाच्या विस्तारीकरणासाठी भाजपा-महायुती सरकार विशेष प्रयत्नशील आहे. याचाच भाग म्हणून सन २०२३ मध्ये राज्याचे तत्कालीन उपमुख्यमंत्री देवेंद्र फडणवीस यांच्या विशेष पुढाकारामुळे कराडच्या विमानतळ विस्तारीकरणासाठी राज्य शासनाने २२१.५१ कोटी रुपयांचा निधी मंजूर केला.
अपुऱ्या निधीमुळे विस्तारीकरणात अडथळा : पण या निधीमध्ये भैरवनाथ पाणी योजनेच्या पाईपलाईनच्या स्थलांतरासाठी २०१२ च्या शासन निर्णयात नमूद केलेली ८ कोटी ५० लाखांची तरतूद तशीच ठेवण्यात आली होती. वास्तविक या खर्चात संबंधित पाईपलाईनचे स्थलांतर शक्य नसल्याने, स्थलांतराअभावी विमानतळ विस्तारीकरण कामात अडथळा निर्माण झाला होता.
मुख्यमंत्र्यांशी वस्तुस्थितीबाबत चर्चा : विमानतळ विस्तारीकरणाच्या कामाला गती देण्यासाठी, भैरवनाथ पाणी योजनेच्या पाईपलाईनच्या स्थलांतरासाठी सुधारित वाढीव खर्चास मंजुरी मिळावी, यासाठी आमदार डॉ. अतुल भोसले गेल्या अनेक महिन्यांपासून प्रयत्नशील होते. याबाबत त्यांनी मुख्यमंत्री देवेंद्र फडणवीस यांची भेट घेऊन वस्तुस्थितीबाबत चर्चा केली होती.
मागणीची दखल : आ.डॉ. अतुल भोसले यांच्या मागणीची दखल घेत, शासनाने भैरवनाथ सहकारी पाणीपुरवठा योजनेच्या पाईपलाईन स्थलांतरासाठी १७.१६ कोटी रुपयांच्या सुधारीत खर्चाच्या निधीस प्रशासकीय व वित्तीय मान्यता दिली आहे. याबाबतचा शासन आदेश ४ ऑगस्ट रोजी सामान्य प्रशासन विभागाकडून प्रकाशित करण्यात आला आहे.
सुधारित खर्चला मंजुरी : भैरवनाथ सहकारी पाणीपुरवठा योजनेच्या पाईपलाईन स्थलांतरासाठी सुधारित खर्चाला मंजुरी मिळाल्यामुळे कराड विमानतळाच्या विकासाला गती मिळणार असून, पायाभूत सुविधांच्या दृष्टीने हा निर्णय महत्त्वाचा ठरणार आहे.
आभार : या निर्णयाबद्दल राज्याचे मुख्यमंत्री देवेंद्र फडणवीस, केंद्रीय नागरी उड्डाण राज्यमंत्री मुरलीधर मोहोळ, उपमुख्यमंत्री एकनाथ शिंदे, अजित पवार व आ.डॉ. अतुल भोसले यांच्यासह भाजपा-महायुती सरकारचे आभार व्यक्त केले जात आहेत.
