पृथ्वीराजबाबांनी कराडची ओळख विकासात्मक कार्यातून पुढे नेली 

कराड/प्रतिनिधी : –

थोर नेते यशवंतराव चव्हाण, आनंदराव चव्हाण, पी. डी. पाटील यांच्यासारख्या सोज्वळ नेतृत्वांनी कराडला पुढे नेण्याचे काम करून महाराष्ट्राच्या राजकारणात कराडची एक वेगळी ओळख निर्माण केली. पृथ्वीराजबाबांनी कराडची हीच ओळख विकासात्मक कार्यातून पुढे नेली. त्यांनी मुख्यमंत्री असताना कराडसह महाराष्ट्रात मोठी विकासकामे केली असून त्यांना पुन्हा राज्याचे नेतृत्व करण्याची संधी आपण मतदानातून द्यावी, असे आवाहन माजी मंत्री सतेज उर्फ बंटी पाटील यांनी केले.

प्रचार सभा : कराड शहरातील विठ्ठल चौक व आंबेडकर चौकात महायुतीतर्फे काँग्रेसचे उमेदवार आ. पृथ्वीराज चव्हाण यांच्या प्रचारार्थ आयोजित प्रचार सभेत ते बोलत होते. यावेळी आ. पृथ्वीराज चव्हाण, पक्षाचे प्रभारी प्रकाश नहाटा, माजी मंत्री लक्ष्मणराव ढोबळे, खा. चंद्रकांत हंडोरे, अॅ ड. उदयसिंह पाटील – उंडाळकर, युवक काँग्रेसचे प्रदेश उपाध्यक्ष शिवराज मोरे आदींची प्रमुख उपस्थिती होती.

विरोधकांकडे सांगण्यासारखे स्वकर्तृत्व नाही : पृथ्वीराज चव्हाण यांचा गल्लीपासून दिल्लीपर्यंत असलेला दबदबा सांगताना बंटी पाटील म्हणाले, आपणा सर्वांना अभिमान वाटावा अशी राज्य आणि देशात पृथ्वीराजबाबांची ओळख आहे. परंतु, विरोधकांकडे  सांगण्यासारखे काहीही स्वकर्तृत्व नाही. त्यामुळे ते पैशांचा वापर करत आहेत. त्यांच्या भूलथापांना बळी न पडता विरोधकांचा कंडका पाडा, घणाघातही त्यांनी यावेळी केला. 

भाजपचा डाव ओळखा : भाजपकडून जाती जातीत, धर्मात द्वेष पसरवला जात असून हा त्यांचा डाव आपण ओळखला पाहिजे, असे मत लक्ष्मणराव ढोबळे यांनी व्यक्त केले.

बाबांनी बहुजन हित जोपासले : माजी मुख्यमंत्री आ. पृथ्वीराज चव्हाण यांनी आयुष्यभर बहुजन हिताचा विचार जोपासला. त्यांचा विचार आणि ध्येय हे कराडच्या विकासासाठी कायम राहील. राज्याला पुन्हा त्यांच्यासारखे नेतृत्व लाभण्यासाठी त्यांना मोठ्या मताधिक्याने विजयी करा, असे आवाहन खा. चंद्रकांत हंडोरे यांनी व्यक्त केले.

लोकसभेला जनतेचा भाजपविरोधी आक्रोश दिसला : राज्यात आणि केंद्रात असलेले भाजपचे सरकार शेतकरी, महिला व युवकांच्या विरोधातील सरकार असल्याचे सांगत आ. पृथ्वीराज चव्हाण म्हणाले, शेतमालाला हमीभाव नाही, महागाईचा भडका उडाला आहे. यामुळे त्रस्त झालेल्या जनतेचा आक्रोश लोकसभा निवडणुकीत भाजपच्या झालेल्या पराभवातून दिसून आला.

महाराष्ट्रात लोकसभेची पुनरावृत्ती : लोकसभा निवडणुकीमध्ये महाविकास आघाडीला 65 टक्के लोकांनी कौल जिल्ह्याच्या सांगत आ. चव्हाण म्हणाले, लोकसभा निवडणुकीचीच पुनरावृत्ती विधानसभा निवडणुकीत झाल्याचे दिसून येईल. त्यामुळे राज्यात महाविकास आघाडीचेच सरकार येणार असून त्यानंतर महिलांना प्रतिमहा तीन हजार रुपये देणार, शेतकऱ्यांना तीन लाखापर्यंत कर्जमाफी, तसेच सुशिक्षित तरुणांना प्रतिमहा भत्ता देणार असून या योजनांचा सरकारी तिजोरीवर कुठेही भर पडणार नाही, याची काळजी सरकार घेईल, असेही त्यांनी यावेळी स्पष्ट केले.