कराड/प्रतिनिधी : –
कराड दक्षिण विधानसभा मतदारसंघातील महाविकास आघाडीचे अधिकृत उमेदवार आ. पृथ्वीराज चव्हाण यांनी कराड शहर व परिसरातील व्यापारी, व्यावसायिक, तसेच थेट नागरिकांच्या घरी जावून भेटी देत संवाद साधला.आ. पृथ्वीराज चव्हाण यांच्या या दौऱ्यात कराडमधील नागरिकांनी उस्फुर्त प्रतिसाद देत बाबांना बहुमताने निवडून देण्याचा निर्धार केला.
बाबांनी केलेल्या विकास डोळ्यांनी दिसतोय : शहरातील सुद्य नागरिकांनी आ. पृथ्वीराज चव्हाण यांनी कराड दक्षिण विधानसभा मतदारसंघात केलेला विकास प्रत्यक्ष डोळ्याने दिसत असल्याचे बोलून दाखवले. मात्र, विरोधकांनी विकासाची पोस्टरबाजी केली आहे. याचा तुलनात्मक विचार करता पृथ्वीराजबाबांना मोठ्या मताधिक्याने निवडून देण्याचा निर्धार ठिकठिकाणच्या भेटीदरम्यान नागरिकांनी केला.
कराडचा चेहरामोहरा बदलला : माजी मुख्यमंत्री पृथ्वीराज चव्हाण यांचा स्वच्छ प्रतिमा, निष्कलंक कारभार व उत्तम प्रशासक म्हणून देशात लौकिक झाला. सहाजिकच कराड दक्षिण विधानसभा मतदारसंघाचा विकास करण्यात पृथ्वीराजबाबांना यश आले आहे. त्यांनी कराडमध्ये मध्यवर्ती बसस्थानक, सुसज्ज प्रशासकीय इमारत, पोलीस वसाहत, कृष्णा नदीकाठी संरक्षक भिंत, शहराला जोडणाऱ्या पाच प्रमुख रस्त्यांचे विस्तारीकरण, भूकंप संशोधन केंद्र, एम – एच ५० व आरटीओ ऑफिस, शासकीय कृषी महाविद्यालय या प्रमुख गोष्टी उभारत कराड शहराचा चेहरामोहरा बदलला.
कराड जिल्हा करण्यासाठी पायाभूत सुविधा : माजी मुख्यमंत्री आ. पृथ्वीराज चव्हाण यांनी कराड जिल्हा करण्यासाठी लागणाऱ्या सर्व पायाभूत सुविधा उभारत कराडकरांना विश्वास दिला. या बळावर पृथ्वीराज चव्हाण यांना कराड शहरात प्रचारादरम्यान संवाद साधताना प्रतिसाद मिळत आहे. त्यांनी शहरातील व्यापारी, व्यावसायिक ते थेट नागरिकांच्या घरी जावून भेटी दिल्या. प्रत्येक ठिकाणी त्यांचे नागरिकांनी उस्फूर्तपणे स्वागत केले. ठिकठिकाणी सुज्ञ नागरिकांनी आपल्या भावना मांडल्या.
बाबांकडे विकासाची दूरदृष्टी : कोणताही भेदभाव न करता पृथ्वीराज चव्हाण यांनी आपले कार्य सुरू ठेवले असून त्यांच्याकडे विकासाच्या दृष्टी आहे. त्यांनी केलेल्या विकासामुळे कराडला वेगळी ओळख मिळाली. राज्यातील विकसित शहर म्हणून कराडचा लौकिक झाल्यामुळे शहरात औद्योगिक व शैक्षणिक क्रांती झाली आहे. अशा नेत्याच्या पाठीशी राहण्याचा निर्धार कराड शहरातील नागरिकांनी केला आहे. या पार्श्वभूमीवर आ. चव्हाण यांना नागरिकांच्या भेटीवेळी सदरच्या प्रतिक्रिया व भावना ऐकायला मिळाल्या.
पोस्टरद्वारे विकासाचा भ्रम निर्माण : बनपुरीकर कॉलनीतील बैठकीत एक नागरिक म्हणाले, निवडणुकीच्या तोंडावर एकाने १०८ कोटी, एकाने ९६ कोटी तर एकाने २०९ कोटी रुपयांचे विकासकामे मंजूर झाल्याचे पोस्टर लावून केवळ विकासाचा भ्रम निर्माण केला. मात्र पृथ्वीराज बाबांनी हे न करता त्यांनी प्रत्यक्ष विकास केला आहे.
कराड दक्षिणसाठी 1800 कोटींची कामे : मी मुख्यमंत्री झाल्यानंतर कराड दक्षिण विधानसभा मतदारसंघात 1800 कोटी रुपयांची कामे केल्याच्या सांगत आ. पृथ्वीराज चव्हाण म्हणाले, कराड हे रचनात्मक व सुसज्ज शहर बनवत मी ग्रामीण भागाचाही चेहरा बदलला. गावोगावी व वाडी वस्तीवर कोट्यवधींचा विकासनिधी दिला. यातून आपला मतदारसंघ आयडॉल करण्याचा मानस ठेवून योजना आखली. यास मोठे यश मिळाले. त्यानंतर देवेंद्र फडणवीस यांचे सरकार आले. त्यानंतर विरोधी सदस्य म्हणून आम्हाला विकास निधी देताना भाजपने खूप कुचराई केली. उद्धव ठाकरे मुख्यमंत्री झाल्यानंतर विकासाची घडी बसविण्यासाठी प्रयत्न सुरू झाले. तोच करोनाची महामारी आली. त्यानंतर एकनाथ शिंदे यांनी गद्दारी करून पुन्हा भाजपचे सरकार आणले. पुन्हा भाजपने सापत्न वागणूक देत निधी कुठला. तरीही आम्ही कराड दक्षिणसाठी जवळजवळ 1500 कोटी रुपयांचा निधी उपलब्ध केला.
साधेपणाने जिंकली मने : कराड शहरात ठिकठिकाणी भेटी देत आ. पृथ्वीराज चव्हाण यांनी नागरिकांशी संवाद साधला. यावेळी त्यांना प्रत्येक ठिकाणी चहापान करण्यासाठी आग्रह करण्यात आला. हा आग्रह स्वीकारत त्यांनी आपला साधेपणा व सर्वसामान्य लोकांमध्ये मिसळण्याची परंपरा कायम राखत त्यांची मने जिंकली. तर ज्येष्ठ नागरिक, महिला, युवक वर्गाबरोबर फोटोसेशनही केले.
