मुकपदयात्रेतून ‘बलिदान मास’चा समारोप; शेकडो शिवशंभूभक्तांचा उत्स्फूर्त सहभाग
कराड/प्रतिनिधी : –
धर्मवीर छत्रपती संभाजी महाराज यांच्या अद्वितीय बलिदानाचे स्मरण आणि त्यांच्या न निघालेल्या अंत्ययात्रेचे प्रतीकात्मक स्वरूप म्हणून कराड शहरात बुधवारी सायंकाळी भावनिक वातावरणात भव्य मुकपदयात्रा काढण्यात आली.
आयोजन : श्री शिवप्रतिष्ठान हिंदुस्थान, कराड यांच्या पुढाकारातून आयोजित या उपक्रमात शेकडो हिंदू बांधव, युवक-युवती आणि शिवशंभू भक्तांनी मोठ्या श्रद्धेने सहभाग नोंदवून संभाजी महाराजांना अभिवादन केले.
प्रारंभ : फाल्गुन अमावास्येच्या दिवशी, म्हणजेच बुधवार दि. १८ मार्च रोजी सायंकाळी ५:३० वाजता कृष्णा नाक्यावरील पांढरीचा श्री मारुती मंदिरापासून या मुकपदयात्रेला सुरुवात झाली. शहरातील प्रमुख मार्गांवरून कन्या प्रशाला, चावडी चौक, आझाद चौक मार्गे ही यात्रा कृष्णा-कोयना नद्यांच्या संगमापर्यंत पोहोचली.
भावनिक वातावरण : संपूर्ण मार्गावर शिस्तबद्ध आणि शांततेत निघालेल्या या यात्रेमुळे परिसरात भावनिक वातावरण निर्माण झाले होते.
धर्मवीर ज्वाला अर्पण : परम पवित्र भगवा ध्वज आणि धर्मवीर छत्रपती संभाजी महाराजांच्या वढू बुद्रुक या स्मृतीस्थळावरून आणलेली धर्मवीर ज्वाला, तसेच त्यापाठीमागे सर्व हिंदू समाजबांधव असे या मुकपदयात्रेचे स्वरूप होते. संगमावर पोहोचल्यानंतर धर्मवीर ज्वालेचे अर्पण करून प्रतीकात्मक दहन करण्यात आले आणि संभाजी महाराजांना सामूहिक आदरांजली वाहण्यात आली.
संदेश : या मुकपदयात्रेद्वारे बलिदान मासाची सांगता करण्यात आली. या उपक्रमातून संभाजी महाराजांच्या त्यागाची आठवण जागवतानाच नव्या पिढीपर्यंत इतिहास पोहोचवण्याचा संदेश देण्यात आला. कराड शहर व परिसरातील नागरिकांनी मोठ्या संख्येने उपस्थित राहून या उपक्रमास अभूतपूर्व प्रतिसाद दिला.
