हरकती आणि सूचना दाखल करण्याची मुदत १४ ऑक्टोबरपर्यंत
कराड/प्रतिनिधी : –
जिल्हा परिषद आणि पंचायत समिती सार्वत्रिक निवडणूक २०२५ च्या पार्श्वभूमीवर मतदार यादी तयार करण्याची प्रक्रिया सुरु झाली आहे. महाराष्ट्र शासनाच्या आदेशानुसार तहसील कार्यालय, कराड येथे बुधवार, दि. ८ रोजी प्रारूप मतदार यादी प्रसिद्ध करण्यात आली असल्याची माहिती तहसीलदार कल्पना ढवळे यांनी दिली.
हरकती किंवा सूचना : शासनाच्या आदेशानुसार निवडणूक कार्यक्रम जाहीर करण्यात आला असून, त्यानुसार नागरिकांना आपली नावे तपासण्याची व आवश्यक हरकती किंवा सूचना देण्याची संधी देण्यात आली आहे.
महत्वाच्या तारखा : तपशीलवार कार्यक्रमानुसार; प्रारूप मतदार यादी प्रसिद्धी दि. ८ ऑक्टोबर २०२५, हरकती व सूचना दाखल करण्याचा कालावधी दि. ८ ते १४ ऑक्टोबर, अंतिम व अधिप्रमाणित मतदार यादी, मतदान केंद्र व केंद्रनिहाय यादी दि. २७ ऑक्टोबर रोजी प्रसिद्ध करण्यात येणार आहे.
आवाहन : तहसील कार्यालयात गट व गणनिहाय प्रारूप मतदार याद्या सर्वसामान्यांसाठी उपलब्ध करून देण्यात आल्या असून, नागरिकांना कार्यालयीन वेळेत आपली नावे तपासण्याचे आणि काही त्रुटी आढळल्यास हरकती दाखल करण्याचे आवाहन तहसीलदार ढवळे यांनी केले आहे.
