🚩भेट दोन 🐯 साहेबांची 🐯…. नित्य स्मरणातील! 🚩

काळ आणि वेळ नित्यच बदलत असते, पण काही दिवस आणि भेटी मात्र आयुष्यभर सोबत करत राहतात! अशीच अविस्मरणीय भेट हृदयाच्या खोलीत दडून बसली होती. विजयसिंह पाटील या मित्राने पाठवलेल्या एका पोस्टने तिला पुन्हा ताजेतवाने केले आहे. शिवाय त्याच्या व अजय उंडाळकर यांच्या समवेत विचारविनिमय करून अखेर हा लेखन प्रपंच आरंभिला आहे.

कराड मधील १९९० च्या दशकातील काळ एका व्यक्तिरेखेने भारावून टाकला होता आणि ती व्यक्ती म्हणजे *हिंदुहृदयसम्राट शिवसेना प्रमुख श्रद्धेय बाळासाहेब ठाकरे!* त्यांच्या जहाल हिंदुत्ववादी विचारांचा प्रभाव आणि पगडा आमच्या सारख्या असंख्य तरुणांच्या सभोवती जणू फेर धरून होता. त्या काळात कराड अनेक अर्थाने संवेदनशील म्हणून गाजत होते. काँग्रेस पक्षाचे तळागाळात वर्चस्व होते. त्यामुळे शिवसेने सारख्या संघटनेत शिवसैनिक म्हणून सहभागी होणे म्हणजे तळहातावर विस्तव घेण्याचा प्रयत्न होता.

परंतु, कराडमधील असंख्य तरुणांनी अगदी हसतमुखाने हा विस्तव हाती घेतला होता. त्या वेळी श्री. चंद्रकांत पवार (भाऊ) हे शिवसेनेचे सातारा जिल्हा प्रमुख म्हणून कार्यरत होते. तर विजय उंडाळकर (दाद्या) हा त्यांच्या कारखान्यात होता. साहजिकच त्याच्यावर शिवसेनेच्या विचारांचा पूर्ण पगडा होता. त्याच्या संपर्कात आल्यावर आम्हा तरुणांना देखील साहेबांच्या जहाल विचारांनी घेरून टाकले. अवघ्या अल्पावधीतच सोमवार पेठे सारख्या सुसंस्कृत (?) भागात शिवसेना शाखेचे थाटामाटात उद्घाटन करण्यात आले आणि मला शाखाप्रमुख म्हणून पदोन्नती मिळाली. या उद्घाटन सोहळ्यात सर्वश्री चंद्रकांत पवार, रामभाऊ रैनाक, प्रमोद वेरणेकर, रमेश माने (पत्रकार), नितीन काशीद, बाळासाहेब उमराणी, विठ्ठलराव शिखरे, महंतेश तुळजणवर (आमच्या शाखेचे उपशाखा प्रमुख) तसेच अन्य ज्येष्ठ व श्रेष्ठ मान्यवर उपस्थित होते.

याशिवाय *मयूर गणेश मंडळाच्या* माध्यमातून वर्षभर आम्ही विविध उत्सव, कार्यक्रम साजरे करत होतोच. परंतु शिवजयंती, शिवसेना स्थापना दिवस, साहेबांचा वाढदिवस या दिवशी स्पीकर लावून त्यावर मा. बाळासाहेब यांच्या भाषणाची कॅसेट लावली जायची. त्याच बरोबर सुप्रसिद्ध कलाकार आणि कडवे शिवसैनिक असलेले दादा कोंडके यांच्याही भाषणाची रेकॉर्ड कॅसेट लावली जात असे. मा. साहेबांची भाषणाची शैली जहाल हिंदुत्ववादी असायची तर दादांच्या भाषणात विनोदाची पेरणी केलेली असायची. दादांची भाषणे ऐकताना हशा होत असे तर साहेबांची भाषणे धीरगंभीर वातावरण निर्माण करीत होते.

त्यावेळी शिवसेनेचे विविध मेळावे आयोजित केले जात होते आणि असाच एक मेळावा उंब्रज येथे आयोजित करण्यात आला होता. त्या वेळी आमदार सूर्यकांत महाडिक (चेंबूर) हे सातारा जिल्हा संपर्क प्रमुख म्हणून उपस्थित होते. याच कार्यक्रमात *”शिवसेना प्रमुख मा. बाळासाहेब ठाकरे यांच्या वाढदिवसानिमित्त आम्ही काही शिवसैनिक कराड मधून सायकलवर मुंबईत साहेबांच्या भेटीसाठी जाणार आहोत”* असे मी चंदू भाऊंच्या कानावर घातले. त्यांनी ही गोष्ट महाडिक साहेबांना सांगितली आणि पुढच्या काही क्षणात त्यांनी ती आपल्या भाषणात जाहीर देखील केली. चंदू भाऊंनी खूण करून मला व्यासपीठावर बोलवले. छातीत धडधड होत होती आणि अंग थरथरत होते. भाऊंनी मोठ्या प्रेमाने त्यांच्या जवळ बसवले आणि आमदार महाडिक यांनी त्यांच्या भाषणात माझे कौतुकही केले.

तो दिवस आणि कार्यक्रम संपला व आम्ही सगळे कराडला परतलो. आम्ही सायकलवरून मुंबईला जाऊ याबद्दल सगळेच साशंक होते. पण आमच्या मनाचा निर्धार झाला होता.
जानेवारी महिना उजाडला आणि आम्ही तयारीला लागलो. २३ जानेवारी हा शिवसेना प्रमुखांचा जन्मदिवस! याच दिवशी आपण साहेबांची भेट घ्यायची असे ठरले होते. त्याच वेळी नेमके कोण कोण सोबत येणार याची कल्पना नव्हती. एकमेकांना विचारपूस सुरू होती. त्यातील काही जणांनी स्पष्टपणे नकार दिला तर काही जणांनी त्यांची अडचण सांगितली. कारण त्यावेळी स्वतःची सायकल असणे हे देखील मोठेपणाचे लक्षण मानले जायचे. कन्या शाळेसमोर असलेल्या मेट्रो सायकल मार्टमधून सायकल भाड्याने घेण्याचा शिरस्ता होता. त्या सायकल ॲटलास, हरक्युलस कंपनीच्या वजनदार असायच्या. मागे कॅरियर असल्याने सामान बांधणे शक्य होत असे. आम्ही देखील तिथूनच सायकल भाड्याने घेतली होती.

पण इतक्या लांबच्या प्रवासाला कुणाच्या घरातून संमती मिळणार? ते सुद्धा सायकलवरून जाण्यासाठी? अखेरीस हो नाही करता मी, विजय उंडाळकर, अलंकार जोशी, विक्रांत देशपांडे, भास्कर थत्ते (सगळे एकाच पेठेत, एकाच गल्लीत राहणारे) असे पाच जण मुंबईला जाणार हे निश्चित झाले. सगळ्यांचे घरचे एकमेकांच्या परिचयाचे होते. त्यामुळे त्यांचा होकार मिळवण्यासाठी फारसे प्रयत्न करावे लागले नाहीत. परंतु त्यांच्या मनातील धाकधूक आम्हाला देखील जाणवत होती.

दिवसागणिक तयारी सुरू होती आणि दिनांक २० जानेवारी १९९० रोजी आम्ही कराडमधून मुंबईच्या दिशेने सायकलला पायडल मारले.

क्रमश : 

समीर श्री. आराणके (ज्येष्ठ पत्रकार कराड) 
दूरभाष : ९४०३१६६५५८