कराडमध्ये भाजपची घोडदौड वेगवान; जि.प, पं.स निवडणुकीत भाजपचा एकहाती विजय होईल
कराड/प्रतिनिधी : –
कराड शहरानजीकच्या मोठ्या सैदापूर ग्रामपंचायतीचे सरपंच फत्तेसिंह जाधव, उपसरपंच अनिल जाधव यांच्यासह चरेगाव, साबळवाडी, चितळवाडी आदी गावांतील सरपंच, सदस्य आणि मान्यवरांनी भारतीय जनता पक्षात प्रवेश केला. मुंबईतील पक्ष कार्यालयात हा प्रवेश प्रदेशाध्यक्ष रवींद्र चव्हाण, आमदार डॉ. अतुल भोसले आणि आमदार मनोज घोरपडे यांच्या उपस्थितीत झाला. प्रवेशामुळे कराड दक्षिण आणि उत्तरमध्ये भाजपची ताकद वाढली आहे.
विकासाची वाटचाल अधिक गती घेईल : याप्रसंगी मार्गदर्शन करताना प्रदेशाध्यक्ष रवींद्र चव्हाण म्हणाले, कराड दक्षिण आणि उत्तर विधानसभा मतदारसंघातील सामाजिक बांधिलकी जपणारे नेते पक्षात दाखल होत आहेत. आमदार अतुल भोसले आणि आमदार मनोज घोरपडे यांच्या नेतृत्वात सुरू असलेली विकासाची वाटचाल अधिक गती घेईल, असे त्यांनी सांगितले.
सैदापूरचे प्रश्न मार्गी लावू : सैदापूर हे कराड तालुक्यातील सर्वाधिक लोकसंख्या असलेले गाव असून, फत्तेसिंह जाधव यांच्या प्रवेशाने संपूर्ण गाव भाजपच्या विचारसरणीशी जोडले गेले असल्याचे सांगत आमदार डॉ. अतुल भोसले म्हणाले, ग्रामपंचायत आणि सोसायटी पातळीवरही भाजपची ताकद वाढली असून, सैदापूरचे सर्व प्रश्न आम्ही प्राधान्याने मार्गी लावू,” असे त्यांनी आश्वासन दिले.
आणखी राजकीय भूकंप घडणार : सैदापूरसह चरेगाव, साबळवाडी, चितळवाडी आदी गावांतील सरपंच, ग्रामपंचायत सदस्य, ग्रामस्थ पक्षात दाखल झाल्याने पाल आणि सैदापूर जिल्हा परिषद गटात भाजपची ताकद वाढली असल्याचे सांगत आमदार मनोज घोरपडे म्हणाले, येथे भाजपचा एकहाती विजय होईल. जिल्हाध्यक्ष अतुल भोसले यांचे नेतृत्वाखाली जिल्हा परिषद आणि पंचायत समितीवरही भाजपचा झेंडा फडकेल. तसेच पुढील काळात आणखी मोठे राजकीय भूकंप घडणार असल्याचे त्यांनी सांगितले.
