राजश्री पाटील; कराड उपविभागीय पोलीस कार्यालय व सुखायु फाऊंडेशनतर्फे राष्ट्रीय आयुर्वेद दिवस उत्साहात साजरा
कराड/प्रतिनिधी : –
आज बदललेल्या जीवनशैलीमुळे अगदी कमी वयापासून अनेक आजार मागे लागत आहेत. असे आजार टाळण्यासाठी सर्वांनी आयुर्वेद आणि योग उपचारांना आपल्या रोजच्या जीवनाचा भाग करण्याचा संकल्प आज आयुर्वेद दिवसाच्या निमित्ताने करुया, असे आवाहन उपविभागीय पोलिस अधिकारी राजश्री पाटील यांनी केले.
राष्ट्रीय आयुर्वेद दिवस : दि. २३ सप्टेंबर हा दिवस भारत सरकारच्या आयुष मंत्रालयाने राष्ट्रीय आयुर्वेद दिवस घोषित केला आहे. यानिमित्त कराडमधील सुखायु फाऊंडेशन या सेवाभावी संस्थेद्वारे उपविभागीय पोलीस अधिकारी कार्यालयाच्या सहकार्याने पोलिस बांधव-भगिनींसाठी संधिवात आणि व्हेरिकोज व्हेन्स उपचार शिबिराचे आयोजन करण्यात आले होते. याप्रसंगी राजश्री पाटील बोलत होत्या.
पंचकर्म उपचार, प्राणायाम व योगासने : यावेळी उपस्थित पोलिसांना आयुर्वेदिक निदान व उपचार, तसेच तत्काळ वेदनमुक्ती देणारे पंचकर्मातील काही उपचार या सेवा उपलब्ध करून देण्यात आल्या. यासोबतच योगासने व प्राणायाम विषयक मार्गदर्शन आणि फिजिओथेरपी उपचारदेखील शिबिराच्या निमित्ताने उपलब्ध करण्यात आले होते. कार्यक्रमाची सुरूवात मान्यवरांच्या हस्ते आरोग्य देवता भगवान श्री धन्वंतरी पूजनाने झाली.
भूमिका : सुखायु फाऊंडेशनचे अध्यक्ष वैद्य नचिकेत वाचासुंदर यांनी राष्ट्रीय आयुर्वेद दिवस साजरा करण्यामागची भूमिका मांडली. विविध आजारांवरील उपचारांबरोबरच व्यक्ती आजारी पडू नये, यासाठी आयुर्वेदाचे महत्व सांगितले.
सूर्यनमस्कारांचे महत्त्व : चैतन्य योग साधना वर्गाचे योग प्रशिक्षक प्रकाश धोकटे यांनी निरोगी व तणावमुक्त जीवनासाठी योगोपचार व सूर्यनमस्कारांचे महत्त्व याविषयी मार्गदर्शन केले.
आयुर्वेदिक औषधे व पंचकर्मांची मदत : आयुर्वेद व पंचकर्म तज्ञ वैद्य सौ. वरदा वाचासुंदर यांनी पोलिसांमधील मणक्याचे विकार व्हेरिकोज व्हेन्स, तसेच कमी वयात उद्भवणारे विविध आजार टाळण्यासाठी योग्य आहार, नियमित व्यायाम, आयुर्वेदिक औषधे व पंचकर्मांची मदत याविषयी माहिती सांगितली. राजयोग क्लिनिकचे डॉ. अभिषेक मोरे यांनी फिजिओथेरपी उपचारांची माहिती उपस्थितांना दिली.
मान्यवरांची उपस्थिती : कार्यक्रमाच्या अध्यक्षस्थानी राजश्री पाटील होत्या. यावेळी वरिष्ठ पोलीस निरीक्षक राजू ताशिलदार, कराड तालुका पोलीस ठाण्याचे पोलीस निरीक्षक महेंद्र जगताप यांच्यासह पोलीस अधिकारी, कर्मचारी, होमगार्ड मोठ्या संख्येने या शिबिरासाठी उपस्थित होते. सुखायु फाऊंडेशनचे वैद्य मिहीर वाचासुंदर यांनी प्रास्ताविक केले. निनाद आराणके यांनी आभार मानले.
