यशवंत विचारांना साजेसे काम करणार 

कराड/प्रतिनिधी : –

माझ्या मनात कोणाबद्दलही द्वेष भावना, सुड भावना नाही. परंतु, माजी मुख्यमंत्री पृथ्वीराज चव्हाण यांच्याकडून आपल्याला एक लोकप्रतिनिधी, मोठा नेता म्हणून खूप अपेक्षा होत्या. मात्र, त्यांनी अत्यंत खालच्या पातळीला जाऊन राजकारण केले. तसे करायला नको होते. आम्ही कधीही तसे केले नाही; कोणाला करूही दिले नाही. कराडला यशवंत विचाराचा मोठा वारसा असून तो जपत त्याला साजेसे काम करणार असल्याचे कराड दक्षिण विधानसभा मतदारसंघाचे नवनियुक्त आमदार डॉ. अतुलबाबा भोसले यांनी सांगितले. 

यश मतदारांना समर्पित : आमचे नेते माजी उपमुख्यमंत्री देवेंद्र फडणवीस यांच्या मार्गदर्शनाखाली राज्यात महायुतीच्या माध्यमातून निवडणुका लढवण्यात आल्याचे सांगत डॉ. अतुलबाबा म्हणाले, राज्यातील मतदार बंधू – भगिनींनी साथ दिल्याने महायुतीला मोठे यश मिळाले आहे. तसेच कराड दक्षिण विधानसभा मतदारसंघातही देवेंद्र फडणवीस यांच्या मार्गदर्शनानुसार काम केले. यामध्ये भाजप मित्रपक्ष आणि आमच्या सर्व पदाधिकारी, कार्यकर्त्यांनी अत्यंत चांगले काम केले. जनतेनेही आपल्याला संधी देऊन माझ्यावर मोठी जबाबदारी टाकली आहे. हे यश आपण कराड दक्षिण विधानसभा मतदारसंघातील जनतेला समर्पित करत असल्याचेही डॉ. अतुलबाबा भोसले यांनी सांगितले.

85 नंतर रेठऱ्याला संधी 

85 सालानंतर पहिल्यांदा रेठरे बद्रुकला

कराड दक्षिणचे प्रतिनिधित्व करण्याची संधी मिळाली आहे. डॉ. अतुलबाबांनी गेल्या 10 वर्षांत विकासकामे आणण्यासाठी आणि विविध योजना जनतेपर्यंत पोहोचवण्याचा प्रयत्न केला. तसेच मतदारसंघाच्या विकासाचे व्हिजन त्यांनी लोकांसमोर ठेवले. त्याला मतदारांनीही साथ दिली. माजी मुख्यमंत्री विद्यमान आमदारांचा डॉ. अतुलबाबांनी पराभव केल्याने निश्चितच हा मोठा विजय आहे. 10 वर्षांत विद्यमान लोकप्रतिनिधींनी काहीच विकास केला नाही. काही गोष्टींची योग्य वेळ यावी लागते. डॉ. अतुलबाबांनी त्यांना असलेल्या सामाजिक कार्याचा वारसा जपत  तळागाळातील लोकांपर्यंत पोहोचण्याचा प्रयत्न केला. त्यामुळेच हे यश मिळाल्याचे मत कृष्णा कारखान्याचे चेअरमन डॉ. सुरेश भोसले यांनी व्यक्त केले.